Le grant desir d'aymer my tient

Le grant desir d’aymer my  tient
Quant de la belle me souvient,
Et du Jolly temps qui verdoye
 Et hoye!

Tantost aller y my convient
Vers celle là qui mon cueur tient,
Je croy qu’el en aura grant joye.
Et hoye!

"Belle, je viens par devers vous
Pour avoir plaisir et secours
Vostre amour trop fort me guerroye."
Et hoye!

" Bienviengnez, amy, par amours;
Or me dictes que querez-vous?
Vous fault il rien que de moy j’aye?"
Et hoye!

"Belle, par raison me convient
Dire d’amours ce qu’apartient
Que vostre amy tenu je soye"
Et hoye!

"Je suys celle qui rien ne tient
A son amy, quant il y vient,
Bien vous en monstreray la voye.
Et hoye!

"Ce faulx jalloux souvent y vient,
Lequel m’a dict qu’il me convient
Delaisser l’amoureuse voye."
Et hoye!

"Maiz, mon amy, c’est pour neant.
Car quant de vous il me souvient,
Mon cueur vit et volle de joye.
Et hoye!