Hélas madame

Hellas, ma dame, que je desire tant,
Souffrez, que soye vostre loyal amant.
Tout mon vivant, toujours vous servirai,
 Car vostre suis et toujours le serai.

Toutes sont dames par amour, ce dict on.
Mais n’y a peu qui en ayment le renom.
Et pourquoy non? Car trop voullez choisir.
  Prenez en un et luy faicte plaisir.

" Hellas, beau sire, vous estez bel et bon,
Sage et courtoys et de noble maison
Et aussi bon que l’on sçairoit finer,
Mais cil que j’ayme, ne sçairoye oublier."

"Hellas, ma dame, pencés en vostre cas:
Entre nous deulx ne fault point d’avocatz".
"Certes non pas, et vous le sçavez bien.
Allez-vous-en; car vous ne faictez rien".

"Mon cueur souspire et se plaint tendrement,
Quant il ne peult trouver allegement.
Ne sçay comment on me veult dechasser
 S’il est ainsi, j’yray ailleurs chasser.

"Hellas,ma dame, et n’en seray-je point? "
"Certes, beau sire, je ne le vous dis point.
Servez à point: il vous sera mery."
Hellas, ma dame, de bon cueur vous mercy".