Hélas dame

Hélas dame que j'ayme tant,
Plaise vous ma requête ouir :
Vous scavez qu'il i a long temps
Que j'ay désir de vous jouyr ;
Veuillez moy ung peu secourir
Je vous supplie très humblement
Ou du brief m'y fauldra mourir
En deul, en peine et en tourment.

Ne suis-je pas bien malheureux,
Du monde le plus fortuné,
D'estre de vous si amoureux,
Puisque de moy n'avez pitié
J'ay le cueur de dueil sy oultré
Que tantost m'y fauldra mourir,
Ou estre en la terre bouté,
Si ne vous plaist moy secourir.

Elle a la face si gentille
Et le corps fait à l'avenant,
Les tétins rons comme une bille,
Au monde n'est rien plus plaisant :
S'auprès d'elle estoye gésant,
Mon cueur en seroit resjouy
Je prie a Dieu le roy puissant
Qu'une fois j'en puisse jouyr.