Dieu gard celle de deshonneur

Dieu gard celle de deshonneur
Que j ai lontemps ayme:
Je l’ay ayme de tout mon cueur,
Ma jeunesse est passée.
 Or voy je bien que c’est folleur
D’y mectre sa pencée,
Quant elle m'a dict en plorant:
Nos amours sont finées. (bis) 

Despencer m’a faict mon argent,
A la maison d’ung tavernier,
Payer l’escot de maincte gent
 Dont je n’en avoys pas mestier.
Chausses de verd m’a faict porter
Et souliers à poullaine,
Et par devant son huys passer
 Mainctes foys la sepmaine. (bis)